Premio escolar "ATRAPANDO A MEMORIA"

A Fundación Vicente Risco, en colaboración coa Asociación Xuvenil Amencer de Ourense, NovaGalicia Banco e o Concello de Allariz, convocan o PREMIO ESCOLAR VICENTE RISCO “ATRAPANDO A MEMORIA”.

 Esta convocatoria está dirixida a alumnado de 3º e 4º de ESO, que deberá formar equipos de traballo de 5 a 10 persoas, e poderán participar todos os centros de ensino que o desexen.

Os traballos consistirán na elaboración dun caderno de campo centrado nunha parroquia ou nun barrio ou vila, que recollerá: datos xeográficos, datos socioeconómicos, recolla de toponimia, lendas, contos, refráns, adiviñas, tradicións, oficios ou algún dato histórico de relevo.

Tamén poderá incluír a recolla e análise de monumentos, vestixios arqueolóxicos e históricos (mámoas, castros, igrexas, mosteiros, cruceiros, petos de ánimas, pontes, estatuas,…) ou elementos etnográficos singulares (conxuntos de hórreos, fornos, muíños, ferrerías, poldras, …). Calquera  elemento ou información que permita rescatar a memoria do pobo.

O prazo para entregar os traballos remata o 1 de abril de 2013, e remitiranse ao enderezo electrónico
secretaria@fundaciónvicenterisco.com

Consulta as bases completas.