A mellor escola, a casa

13.9.16

AXENDA ESCOLAR REDONDELÁ 2016-17

As axendas escolares que edita o Servizo de Normalización Lingüística e maila Concellaría de Ensino do Concello de Redondela xa están chegando aos centros educativos.

A Axenda escolar redondelá 2016-17 estase a distribuír de xeito gratuito entre o alumnado de ensino primario do CEP Santa Mariña, CEIP Alexandre Bóveda, CEIP de Cedeira, CEIP Igrexa–Chapela, CEIP Laredo, CEIP Outeiro das Penas, CEIP Porto-Cabeiro, CEIP Quintela e CEIP Santo Paio de Abaixo, e do 1º ciclo da ESO do IES Chapela, IES Illa San Simón, IES Mendiño e IES Pedro Floriani. Este é o quinto ano consecutivo no que o Servizo de Normalización Lingüística se encarga da edición destas axendas escolares, co obxectivo de divulgar a cultura e o patrimonio locais entre a poboación máis nova, e promover a normalización da lingua galega entre o alumnado redondelán.

A edición para o curso 2016-2017 inclúe algunhas das actividades de dinamización e normalización lingüística desenvolvidas durante o curso pasado por este SNL para os centros de ensino: roteiros de toponimia, obradoiros de teatro radiofónico, actividades de narración oral, representacións teatrais e actividades das Letras Galegas 2016.
Ademais inclúe traballos escolares e as impresións do alumnado participante nas actividades desenvolvidas. Tamén se recolle parte do patrimonio inmaterial a través de ditos e coplas, a onomástica en lingua galega, as conmemoracións escolares e as celebracións propias de Redondela, e contidos relacionados especificamente coa toponimia local.


Con esta publicación o alumnado redondelán recibe unha ferramenta útil para a organización das tarefas escolares, pero ademais serve para incentivar o seu interese polo seu contorno, a cultura local, e para normalizar o uso da lingua galega na súa vida diaria.

Proxeccións de MAIMIÑO E O ESPELLO MÁXICO

O 2 e 3 de maio, o auditorio da Xunqueira acolleu as proxeccións de MAIMIÑO E O ESPELLO MÁXICO, un filme de animación indicado para alumnado de infantil e primaria. 

Maimiño e o espello máxico é o único filme de animación infantil galego e en galego.Trátase dunha coproducción galego-cubana (Ficción Producciones e ICAIC de La Habana), baseada na adaptación que sobre o clásico Polgariño  escribiu o gran escritor cubano José Martí, e que publicou no ano 1889 na revista La edad de oro


Dirixido por Ernesto Padrón, que contou coa colaboración como director convidado do galego Bruno López, Maimiño conta unha historia chea de ritmo e enerxía, que incorpora na súa trama algúns dos valores más relevantes a trasladar na primeira infancia: a amizade, a xustiza social, o amor ou a importancia do esforzo para acadar os obxectivos. 

As voces en galego están interpretadas por algúns dos principais actores e actrices do panorama actual como María Castro, Javier Rey, Carlos Blanco, Monti Castiñeiras e Antonio Mourelos, entre outros. 

A banda sonora está asinada polo gran autor cubano Silvio Rodríguez, xunto co compositor galego de música para cine e televisión Manu Riveiro. Maimiño conta, ademais, na interpretación dos temas en galego con cantantes da talla de Uxía Senlle e Xoán Curiel. 

A proxección incluíuse dentro das actividades das Letras Galegas 2016, coa intención de ofrecer cinema en galego á poboación infantil, e participaron 548 escolares dos seguintes centros: EEI San Pedro, CEP Santa Mariña, CEIP Outeiro das Penas, CEIP Porto Cabeiro, CEIP Quintela, CEIP Santo Paio de Abaixo, Colexio Vigo e CAPD Chapela.

9.9.16

CONTADA DE PAULA CARBALLEIRA

O 26 de abril celebramos unha actividade de narración oral da man da escritora, contadora e actriz, Paula Carballeira.


Co obxectivo de achegar ao alumnado de secundaria á nosa tradición oral e prestixiar o discurso en galego daquelas persoas que traballan a palabra na nosa lingua, desenvolvéronse dúas sesións nos auditorios do Piñeiral do Crego e da Xunqueira, na que partipou un total de 415 espectadores do IES Chapela e o CAPD de Chapela, e os IES Mendiño, Pedro Floriani e Illa de San Simón.

Paula Carballeira neste traballo parte dos contos de medo tradicionais galegos que nos lembran que a morte está aí, que nos persegue... por iso hai que vivir moito e ben, e rir sempre que se poida...

A actividade incluíuse na programación das Letras Galegas 2016.

ROTEIROS DE TOPONIMIA

O Servizo de Normalización Lingüística do Concello de Redondela organizou uns ROTEIROS DE TOPONIMIA para alumnado redondelán, que desenvolveu TRESPÉS, SOC. COOP. GALEGA.

Os percorridos realizáronse en catro ámbitos distintos:
Roteiro 1. A historia mariñeira da vila de Redondela e Vilavella. Roteiro 2. Quintela. Roteiro 3. Cabeiro-Negros. Roteiro 4. Chapela.



Baixo o título “A memoria da Redondela mariñeira” o alumnado participou dunha ruta pola vila, onde aprenderon a orixe de topónimos como Cabo dos Fumeiros, rúa Ribeira ou Campo das Redes, e souberon onde se atopaban outros como "O Cagadouro", A Esfarrapada, a Praza do Estaleiro, a rúa do Medio, Vilavella, A Xunqueira, "a banda da maré", "a poza da becha" ou "o pulpizo".

No percorrido por Chapela descubriron onde está o río Maceiras (tamén chamado Segade), o Fondón, que hai un peto de ánimas que dá nome á rúa das Ánimas, e outros lugares como Cidadelle, Laredo, Trasmallo, e o Cubillón. E mesmo falamos cun home maior que nos dixo que se perderon nomes que existían como o Camiño das Hortas (a carón do centro acuático) ou a Veigha do Medio (onde estaba antigamente a fábrica de Cardona).


Na ruta por Cabeiro aprenderon a relación dalgúns topónimos relacionados coas pedras ou a auga, e souberon de nomes de lugar como A Minada, Pociños, Coutadiñas, ou o Muíño do Castro.

No percorrido por Quintela tamén afondaron neste coñecemento, souberon de topónimos relacionados con accidentes xeográficos e coa vexetación, como O Pumar.

Na actividade participoron máis de 400 alumnas/os do CEP Santa Mariña, dos CEIP Santo Paio de Abaixo, Quintela, Porto-Cabeiro, Laredo, Igrexa-Chapela e Alexandre Bóveda; e dos IES Mendiño e Illa de San Simón.

6.7.16

Um mural para Celso Emilio no IES de Chapela

No seguinte vídeo podedes asisitir ao recitado colectivo do poema "Deitado frente ao mar" que tivo lugar no IES de Chapela durante o acto de inauguración do mural dedicado a Celso Emilio Ferreiro deseñado e elaborado por alumnado de 4º ESO.
No acto contamos coa presenza de Luís Ferreiro, fillo do poeta e director da súa fundación.

25.5.16

Obradoiros de teatro radiofónico con Santiago Cortegoso

No mes de abril celebráronse obradoiros de introdución ao teatro radiofónico, e práctica de dramatización, orientados a alumnado de 3º ciclo de primaria e ESO.

Cada xornada formativa tivo unha duración de 3 horas, nas que Santiago Cortegoso (Ibuprofeno Teatro) fixo unha introdución ao mundo da dobraxe e da teatralización radiofónica, e logo traballou, sobre un texto previamente escollido por cada centro, co grupiño de alumnas e alumnos que poñerían voces ás gravacións das pezas en Radio Redondela.

Nesta actividade participou alumnado do Colexio Vigo, dos CEIP Laredo e Santo Paio de Abaixo, e dos IES de Chapela, Illa de San Simón, Mendiño e Pedro Floriani.

No mes de maio comezaron as gravacións na Radio Municipal de Redondela, e no mes de xuño realizarase o concurso para premiar a mellor dramatización e a maior calidade lingüística.



Obradoiros "FAI UN MONICREQUE"

Durante o mes de marzo desenvolvéronse os obradoiros FAI UN MONICREQUE, desenvolvidos por Tanxarina Títeres, en distintos centros de ensino de Redondela.

Con esta actividade formativa, ademais de achegar o mundo dos monicreques aos máis pequenos, perséguese desenvolver a súa capacidade creativa e favorecer o seu desenvolvemento persoal.

Con materiais e elementos sinxelos (bolas de cortiza ou porexpán, anacos de tea, lás, etiquetas adhesivas, varas de madeira, panos, botóns, etc., constuiron os seus propios monicreques.

A actividade desenvolveuse para alumnado de 6 a 12 no CEP Santa Mariña, nos CEIP Quintela, Porto-Cabeiro, Santo Paio de Abaixo, Alexandre Bóveda, Outeiro das Penas, Laredo, Cedeira, Igrexa-Chapela e no Colexio Vigo, e participou un total de 545 rapaces e rapazas. Algúns centros falaron da actividade.

Funcións escolares do espectáculo de monicreques A CASA DO AVÓ

A Concellaría de Cultura e mais o Servizo de Normalización Lingüística organizaron, no mes de febreiro, funcións escolares do espectáculo de monicreques A CASA DO AVÓ, da compañía redondelá Tanxarina Títeres.

Función no Piñeiral do Crego
A función combina traballo actoral con manipulación de siluetas, e está escrita e dirixida por Cándido Pazó. Foi premiada como Mellor Espectáculo Infantil nos premios María Casares 2015.

Trátase dunha obra de teatro social e educativo onde os dereitos da infancia van máis aló do puramente artístico, e na que o público recibe información do que pasa ao seu redor para conseguir a súa implicación na xustiza social e na igualdade.
Función na Xunqueira
As representacións celebráronse no auditorio do Piñeiral do Crego en Chapela, para alumnado dos CEIP Igrexa-Chapela, Laredo e Alexandre Bóveda, e do Colexio Vigo; e no da Xunqueira en Redondela, no que participou alumnado do IES Floriani, CEP Santa Mariña e dos CEIP de Cedeira, Outeiro das Penas e Santo Paio de Abaixo. As 3 funcións celebráronse cheas de arte interpretativa e manipulación de monicreques, pero tamén de denuncia, solidariedade e orgullo pola nosa lingua, e asistiron máis de 665 rapazas e rapaces.
 
Actores de Tanxarina


10.3.16

MULLERES DO MUNDO, DISTINTA ORIXE - IGUAL RELEVANCIA

Co motivo do día 8 de Marzo, o  CEIP PORTO-CABEIRO, a partir do proxecto traballado este curso dende a Biblioteca: Estación Porto-Cabeiro "Unha viaxe polo mundo", elabora este vídeo para dar a coñecer unha protagonista de cada pais.



4.2.16

Funcións escolares do musical "CARAPUCHIÑA VERMELLA"

O ano comezou con teatro e moita música para os escolares redondeláns que participaron das funcións  de CARAPUCHIÑA VERMELLA, o musical da compañía Educateatro Producións.

Alumnado coas caretas no Piñeiral do Crego, Chapela

Esta foi a primeira actividade do trimestre organizada dende o Servizo de Normalización Lingüística, en colaboración cos centros de ensino redondeláns. 
Realizáronse tres pases de Carapuchiña Vermella (1 en Chapela o 22 de xaneiro, e 2 en Redondela o 25 de xaneiro), no que participaron 748 escolares das escolas infantís: A Marisma, San Pedro e Ventosela; e dos centros de primaria: CEP Santa Mariña, CEIP Alexandre Bóveda, CEIP de Cedeira, CEIP Igrexa-Chapela, CEIP Laredo, CEIP Outeiro das Penas, CEIP Porto Cabeiro, CEIP Quintela e CEIP Santo Paio de Abaixo. As idades das escolares ían dos 4 aos 10 anos.

Esta é unha versión particular do clásico dos Irmáns Grimm, unha adaptación modernizada na que os personaxes do conto están máis próximos á actualidade.

A historia está narrada por Plácido, un escritor de contos que, axudado pola súa vella máquina de escribir, traballará arreo para mecanografar o conto máis bonito do mundo enteiro: Carapuchiña Vermella.

A proposta mestura teatro de actor con manipulación de corpóreos e voz en directo, para transmitir aos cativos e cativas valores como a ecoloxía e a igualdade ao mesmo tempo que ensina a reciclar ou as profesións, evitando a compoñente sexista. 


Carapuchiña Vermella, O Musical está composto por sete cancións orixinais cantadas en directo e pensadas especialmente para as idades máis temperás.

(Fotos de Rafa Estévez)