Coordinadora ENDL Redondela

SINBAD no Auditorio da Xunqueira

2012-02-08T10:48:00.000Z

SINBAD en Redondela

2012-01-31T11:10:00.000Z

Proxección de cinema galego promovido dende o SNL do Concello de Redondela.

Venres, 3 de febreiro de 2012, ás 19.00 h.

Auditorio do Piñeiral do Crego, Chapela.

Sábado, 11 de febreiro de 2012, ás 19.00 h.

Auditorio da Xunqueira, Redondela.

Xornadas de interese cultural no IES Mendiño

2012-01-17T12:42:00.001Z

O IES Mendiño está a desenvolver unha interesante iniciativa cultural para divulgar coñecementos de interese sobre a nosa cultura entre o alumnado e as familias do centro.

Xosé Couñago Ribeira faloulles, nunha das sesións, dos lugares máxicos de Redondela.
Pódese ver nesta ligazón de REDONDELA.TV

http://www.lacasanatural.com/redondelatv/portada_arqueoloxia_maxicos.html

Unha boa iniciativa. Que continúe!

Panxoliña do Apalpador

2012-01-02T13:37:00.000Z

Panxoliña do Apalpador feita polo alumnado de 5 anos do CEIP Alexandre Bóveda de Chapela.

Que ben senta o Nadal galego!

Bo Nadal e ventureiro 2012 para a lingua

2011-12-22T11:13:00.000Z

Conto viaxeiro de Lois Pereiro

2011-12-14T10:02:00.000Z

O alumnado de infantil do CEIP Laredo, coa colaboración do CEIP Igrexa, CEIP Alexandre Bóveda e CEIP Porto Cabeiro de Redondela, e mais a EEI do Con (Moaña), fixeron un conto viaxeiro adicado a Lois Pereiro.

Despois de todo o traballo realizado durante o curso, finalmente, o venres 9 de decembro, fíxose a súa presentación en Laredo cun impresionante "dispositivo mediático" a xeito de estrea de cinema, que fixo participar a toda a comunidade escolar: dende os xornalistas que agardaban ás portas polo alumnado, ata os presentadores que conduciron o espectáculo marabillosamente.

O conto, editado en papel grazas á Concellería de Ensino, en colaboración co SNL, foi entregado tamén a todo o alumnado.

O traballo completouse cun vídeo de presentación, que conta coas propias voces dos cativos. Fixeron as veces de locutores-contadores e achegáronse á nosa lingua oral, algúns deles por primeira vez. Oxalá que non sexa a última!

Conto Viaxeiro LOIS PEREIRO from ceip laredo on Vimeo.

Relatorios de toponimia

2011-12-12T13:32:00.003Z

Unha nova actividade, coordinada polo Servizo de Normalización Lingüística do Concello de Redondela, chegou aos IES Mendiño e IES Illa de San Simón, a través da Coordinadora de ENDL de Redondela.

Vicente Feijoo, técnico do Proxecto de Toponimia de Galicia e membro da Asociación Galega de Onomástica, achegounos á toponimia galega, e explicounos as súas orixes, a importancia da súa recuperación para non perdermos unha importante parte do noso patrimonio, como se comezan os traballos de campo, e como a poboación galega foi dándolles nomes ás cousas, especialmente ás pedras, símbolos importantísimos da nosa cultura.

Ademais, explicounos como podemos facer buscas de topónimos para comprobar onde existen e cal é a forma correcta. Así, xa non teremos excusas para escribir ou dicir mal un nome de lugar que non saibamos.

Open publication - Free publishing - More relatorio

Pero tamén nos animou a pescudar e preguntar aos maiores sobre os nomes dos lugares, sobre todo aqueles que se están a perder.

Obradoiros de portugués, OPS!

2011-12-01T11:29:00.000Z

Continuamos o traballo de dinamización iniciado en abril con dous obradoiros de portugués, OPS!, impartidos por Iria Mayer da AGAL.

Open publication - Free publishing - More 2011

Desta volta celebráronse no IES Mendiño, para alumnado de 1º de bacharelato, e no IES Pedro Floriani, para alumnado de 2º e 3º da ESO.

De novo o alumnado puido constatar que grazas a sermos galegos e termos unha lingua de noso somos quen de entendernos en medio mundo. Temos pois unha vantaxe fronte a outras persoas que non saben galego; esa é a nosa vantaxe competitiva.

Canto máis e mellor saibamos a nosa lingua mellor será o entendemento cos pobos que falan portugués, lingua irmá da galega. E isto demostra que a lingua galega serve tamén para entendérmonos fóra da nosa terra.

Déixovos tamén un agasallo que recibimos no obradoiro, cunha fermosa canción de Adriana Calcanhoto á que o alumnado foi quen de completar a letra.

O XOGO DO PAPAPIO NO OUTEIRO DAS PENAS

2011-11-28T08:59:00.001Z

O pasado martes día 15, o CEIP Outeiro das Penas recibiu a visita de Carlos Casares ...ben..., un achegamento á súa figura, promovida dende o SNL do Concello de Redondela.

O Papapío é unha linguaxe imaxinaria para poder falar cos animais que Carlos Casares inventou no seu conto infantil A galiña azul. Dende a Fundación Carlos Casares envíáronnos un estrafalario e simpático personaxe que, de xeito ameno, achegou ao noso alumnado ás diferentes facetas destes escritor.

Ao remate deste xogo, cada neno e cada nena realiza un cubo / crebracabezas de cartón, onde cada cara do mesmo recrea un aspecto da vida e da obra do escritor. En cada un dos lados empregaron unha técnica distinta pero sempre prestando unha gran atención ás indicacións e comentarios do Papapío:

Primeira cara: O álbum de Carlos Casares.

Segunda cara: Afeccións de Carlos Casares.
Terceira cara: As palabras de Carlos Casares seguen vivas.
Cuarta cara: Érase unha vez os contos de Carlos Casares.
Quinta cara: O seu froito, a súa obra.
Sexta cara: Carlos Casares. O concurso.

A lingua sabe a pan

2011-11-21T13:51:00.000Z

A lingua sabe a pan é o suxestivo título dun Lipdub realizado pola comunidade escolar do CPI Virxe da Saleta, de Cea, sobre unha versión de Sweet Home Alabama de Lynyrd Skynyrd, que fixeron popular os galegos Siniestro Total como Miña Terra Galega.

Unha idea de Álvaro Cunqueiro serviu de motivo para facer a letra deste traballo, que contou coa participación de todo o alumnado do CPI e dos músicos Pedro Feijoo e Charly Lincoln que gravaron, misturaron e produciron nos estudios Muu! de Vigo.

A Lingua sabe a Pan from cpivirxedasaleta on Vimeo.

Un fermoso xeito de promocionar a nosa lingua, para a que tamén fixeron unha versión Karaoke: http://www.youtube.com/watch?v=M_Vb2IxBnOU

Quen se anima?

II Día da Ciencia en Galego

2011-11-04T08:49:00.000Z

O dereito a gozar da ciencia en galego é o título co que este ano se celebra o II Día da Ciencia en Galego, promovido dende a CGENDL.

Este ano celébrase o Ano Internacional da Química, no que se conmemora o premio Nobel de Química concedido a Marie Curie en 1911, polos seus descubrimentos dos novos elementos Radio e Polonio. Marie Courie foi a primeira muller que recibiu un premio Nobel, pero ademais foi a primeira persoa que recibiu dous premios nobeis (Física e Química); razóns de sobra para homenaxeala neste día Galego da Ciencia.

Pero ademais este ano homenaxéase tamén á matemática galega Mª Wonenburger, investigadora nos EEUU e Canadá, que contribuíu enormemente a desenvolver o papel da muller na ciencia, e que foi recoñecida en 2007 pola Unidade Muller e Ciencia da Xunta de Galicia coa creación do Premio María Wonenburger para recoñecemento daquelas mulleres galegas con traxectorias notables no ámbito da ciencia e tecnoloxía.

Serven estas dúas homenaxes para recoñecer o traballo das mestras pioneiras que fan ciencia e mudaron para sempre o papel da muller no ámbito científico.

BELVIS, rede socioeducativa

2011-10-21T13:20:00.000+01:00

A Asociación Socio-Pedagóxica Galega (ASPG) creou unha rede socioeducativa chamada BELVIS, que pretende ser un lugar común onde profesionais do ensino e persoas preocupadas pola educación en xeral, poderán atopar diversos recursos, materiais, ligazóns, xogos, formación e grupos de debate, e á que tamén poderán contribuír.

E por suposto todo na nosa lingua.

Bolsa de actividades da Coordinadora Galega de ENDL

2011-09-16T09:16:00.000+01:00

Para comezarmos a pensar e re-pensar o discurso da normalización lingüística nos centros de ensino, de seguro que vai ser moi útil a nova

BOLSA DE ACTIVIDADES

que propón a Coordinadora Galega de ENDL.

Aquí poderemos ver algunhas interesantes suxestións, e tamén colaborar con outras que vaiamos facendo.

Cómpre comezar xa. Ánimo!

Tres historias para ver... e aprender!

2011-09-15T09:51:00.023+01:00

Para non lle termos medo a este comezo de curso, que malia todos os problemas vai ser fructífero, coma sempre, achegamos unha proposta lúdica e didáctica da Secretaría Xeral de Política Lingüística.

Trátase de "Tres historias para ver... e aprender!", que nos achegan tres curtas de animación coa súa proposta didáctica para traballar nas escolas infantís ou na familia.

Pódense ver a través da ligazón de máis arriba.
Feliz comezo de curso!

Actividades de normalización para os centros de ensino

2011-07-27T10:06:00.002+01:00

Os centros de ensino de Pontevedra, a través dos seus EDL, conxuntamente coa Concellaría de Normalización Lingüística, elaboraron un Banco de Actividades para a Normalización no Ensino en Pontevedra (BANEP).

Este banco de actividades, dispoñible na rede, achega diferentes posibilidades educativas para incidir na promoción, divulgación e normalización da lingua galega na poboación escolar, e nel pódense facer buscas por centro, área, actividades, ou niveis (entre outras opcións).

Pódese acceder premendo na ligazón BANEP.

20 anos dos ENDL

2011-06-17T11:27:00.000+01:00

Hai vinte anos que comezaron a andar os Equipos de Normalización e Dinamización Lingüística, ENDL. Malia as dificultades, o traballo rigoroso e entusiasta do profesorado fixo posible a transmisión deste estímulo a prol da nosa lingua, da súa dignificación e da súa normalización nos centros de ensino e tamén na sociedade.

A nosa felicitación e apoio, e o desexo de continuidade para todos eles.

Parabéns!

Aquí deixamos unha pequena mostra, feita dende a CGENDL, do traballo que os Equipos de Normalización e Dinamización Lingüística proxectan na sociedade dende os centros de ensino.

LOIS PEREIRO, POLOS CAMIÑOS DE FERRO

2011-05-28T11:33:00.005+01:00

O profesorado ABALAR, do CEIP PORTO-CABEIRO, elaborou este LIM sobre o homenaxeado este ano no día das LETRAS GALEGAS , co fin de coñecer sobre o autor non so a súa infancia e xuventude se non tamén a súa poesía políglota froito das súas viaxes e aprendizaxe de idiomas.

Concerto-homenaxe a Lois Pereiro en Redondela

2011-05-18T13:07:00.000+01:00

O xoves, 19 de maio, ás 20.00 h, poderedes gozar da última das actividades organizadas dende o SNL para render unha homenaxe a Lois Pereiro: no Auditorio da Xunqueira contaremos coa presenza de Xurxo Souto e Lino Braxe para facer a presentación e introducción á figura de Pereiro, e de seguido un concerto de Manu Clavijo, que musicou poemas do autor.

É unha boa oportunidade para coñecer de primeira man a obra do poeta homenaxeado nas Letras Galegas 2011.

Animádevos e convencede tamén ao alumnado e coñecidos.

Lois Pereiro dende Redondela

2011-05-18T12:56:00.001+01:00

Como xa dixemos antes, o CEIP de Laredo, foi o gañador do concurso-exposición das Letras Galegas 2011 na categoría infantil-primaria.

Podedes visitar a seguinte ligazón e explorar todo o traballo, pero aquí ímosvos mostrar como proba do bo facer a guía de primaria que elaboraron.

Aproveitade este brillante e didáctico material premendo na imaxe.

Obradoiro de portugués no IES Mendiño

2011-04-15T14:01:00.001+01:00

O día 14 de abril, o IES Mendiño recibiu a visita de Kike Martins, que foi o encargado do obradoiro titulado: Galego, a nosa vantaxe. Portugués, a nossa vantagem.

Estes obradoiros desenvolvidos pola AGAL baixo o epígrafe de OPS!, inciden na necesidade de aproveitarmos a oportunidade de sermos galegos e termos unha lingua propia para achegarnos aos nosos veciños e irmáns da lingua, os falantes da lusofonía.

No vindeiro mes achegaranse tamén ao IES Illa de San Simón.

Mapa botánico do CEIP Laredo

2011-04-04T08:05:00.006+01:00

O CEIP de Laredo inaugurou, na mañá do 1 de abril, o seu ROTEIRO BOTÁNICO no patio do seu centro.

A celebración, neste ano 2011, do ANO INTERNACIONAL DOS BOSQUES, fixo andar esta iniciativa que partiu do Equipo de Dinamización Lingüística do centro, integrado na Coordinadora de Equipos de Normalización Lingüística do Concello de Redondela.

O proxecto, titulado “As fragas… para as persoas”, do CEIP de LAREDO, pretende chamar a atención e sensibilizar a comunidade educativa durante o curso escolar 2010-2011,para mellorar e enriquecer o coñecemento, comprensión, recuperación e conservación das masas arbóreas do seu contorno máis inmediato, e lembrar que son parte esencial da nosa cultura e da nosa lingua.

Elaboraron este MAPA BOTÁNICO, logo dun labor de clasificación e etiquetaxe das especies arbóreas existentes, así como unha audio-guía con códigos QR para os móbiles, que permite facer un seguimento do roteiro, escoitando as explicacións feitas polo alumnado para cada árbore ou arbusto. Cada especie arbórea foi sinalizada cunha placa na que vai toda a información relativa a ela, tal como figura na guía que se pode descargar aquí.

A presentación foi feita por alumnado de 6º de primaria, e completouse cunha guía lúdica dirixida pola especialista Pilar Araújo, de INTEGRA Futuros sostíbeis.

Este traballo, que contou coa colaboración e patrocinio das Concellarías de Medio Ambiente e Normalización Lingüística, quere ser a punta de lanza de futuros traballos de promoción conxunta do noso medio natural e da nosa lingua, para que os rapaces e rapazas sexan quen de apreciar o patrimonio natural e cultural, coa súa posta en valor e co coñecemento das especies arbóreas máis significativas do país.

Open publication - Free publishing - More mapa

Pódese obter máis información e descargar o roteiro na web do CEIP de Laredo http://centros.edu.xunta.es/ceipdelaredo/?page_id=355.

O CEIP de Laredo, gañador do concurso das Letras Galegas 2011

2011-03-18T08:12:00.001Z

A Secretaría Xeral de Política Lingüística vén de anunciar que o traballo elaborado polo CEIP de Laredo foi o gañador na categoría de infantil e primaria no concurso-exposición das Letras Galegas 2011.

Dende a Coordinadora ENDL de Redondela, e en nome de todos os centros educativos redondeláns, queremos transmitirlles os nosos parabéns polo traballo realizado e pola obtención deste recoñecemento.

Mentres non se edita o traballo completo, podedes consultado nesta ligazón do propio centro:

LOIS PEREIRO

BO ENTROIDO!

2011-03-04T08:25:00.000Z

Entre as moitas propostas divulgativas e educativas do entroido galego, escollemos hoxe esta elaborada por MEIGATINTUREIRA, para termos unha visión xeral da tradición máis xenuina do noso entroido.

Presentación ENTROIDO

View more presentations or Upload your own.

Podedes ver tamén outros interesantes traballos na web da Coordinadora Galega CGENDL.

Celebración do Día da Lingua Materna

2011-02-22T11:57:00.000Z

A celebración do Día Internacional da Lingua Materna estivo tamén presente en Redondela.

O ENL do IES Pedro Floriani aproveitou este evento, que se celebra cada 21 de febreiro dende o ano 2000 por iniciativa da UNESCO, para facer que o alumnado reflexione sobre o uso da lingua galega, a nosa lingua materna, sobre a presenza como tal nas súas vidas e sobre os hábitos e actitudes que deberían mudar para que efectivamente se estendese o seu uso na mocidade.

Ademais, a gravación foi proxectada na entrada do centro e foi moi ben acollida polo resto do alumnado, que escoitou e viu estas manifestacións tan substanciosas.

As linguas maternas from SNL Redondela on Vimeo.

Cartafol, novo semanario do ensino

2011-02-18T08:14:00.000Z

Unha nova ferramenta en lingua galega vén de ver a luz: a revista Cartafol, un semanario sobre o ensino que inclúe a normalización lingüística como un dos eixos da publicación.

Cartafol é un novo semanario sobre o ensino galego que ten como base temática a educación en Galiza. Entre os temas principais que abrangue atópanse a normalización lingüística, novas da Consellaría de Educación e dos sindicatos do ensino, protestas dos centros, ofertas de cursos, etc.

Neste primeiro mes de febreiro chega aos centros de xeito gratuíto, pero no sucesivo funcionará baixo subscrición.

Cartafol.gl

Calendario 2011

2011-01-14T13:32:00.021Z

Velaquí o está.
Este é o noso calendario para o 2011, Ano Internacional dos Bosques e da Química.

Que sirva para espallar a nosa lingua nas ciencias, e para divulgar a ciencia na nosa lingua.

Pódense descargar os pdf de balde nestas ligazóns: 1º SEMESTRE / 2º SEMESTRE

Open publication - Free publishing - More galego

Concurso RECICLANDO EN FAMILIA

2011-01-13T08:51:00.000Z

A empresa de servizos educativos e culturais Imaxina organiza o IV Concurso “Reciclando en familia”.

Con este concurso preténdese fomentar e concienciar sobre o valor da reciclaxe, alonxar a idea do consumismo, e conseguir que os nenos e nenas advirtan que no lixo hai outro mundo con moitas posibilidades. Os traballos que se presenten a concurso consistirán en realizar unha obra con material reciclado (do lixo) dándolle liberdade aos rapaces na escolla de materiais e na finalidade da obra.

Pódense presentar rapaces e rapazas dende os 3 aos 11 anos de todos os centros educativos da provincia de Pontevedra. O prazo de entrega de obras estará aberto do 11 ao 24 de xaneiro de 2011. As obras deben ser entregadas nas oficinas de Imaxina, na rúa Montero Ríos, 32 - 3º, en Vigo. Teléfonos de contacto: 986 672812 - 671659204.

As obras deberán vir coa seguinte información:

NOME E APELIDOS DO CONCURSANTE/A

TELÉFONO DE CONTACTO

NOME DO COLEXIO

CURSO

Os gañadores daranse a coñecer do 24 ao 27 de xaneiro.
O venres 28 de xaneiro terá lugar a inauguración da exposición e a entrega de premios aos gañadores, que se celebrará na Casa da Xuventude de Vigo ás 19:00 horas. Os premios serán os seguintes: 1º, un PM4; 2º, dúas entradas para o cine; 3º, un quebracabezas dos Bolechas.

A exposición estará aberta ao público de luns a venres de 09:30 a 14:00 e de 16:30 a 21:00 h, dende o 28 de xaneiro ata o 28 de febreiro.

O galego segue nas aulas!

2010-12-19T16:50:00.000Z

Non podemos evitar facer un recoñecemento a todo o profesorado que seguiu a espallar o coñecemento en galego das asignaturas de ciencias, matemáticas e tecnoloxía.
Así que sumámonos a PROFES CO GALEGO e poñemos aquí a presentación que fixeron para demostralo.

O galego segue nas aulas. Felicidades a todos! from Profes Galego on Vimeo.

Por un fructífero 2011 máis galego!

Viaxando polo tempo coñecendo a nosa Historia

2010-12-06T04:47:00.002Z

Preme no texto. Os nosos Castros

Mamá Cabra en concerto

2010-11-26T13:29:00.005Z

A Concellaría de Normalización Lingüística do Concello de Redondela, en colaboración coa Secretaría Xeral de Política Lingüística e a Editorial Galaxia, presenta un espectáculo musical titulado OLA, OLA, LA!, que se celebrará o domingo 28 de novembro ás 18.00 horas, no Auditorio da Xunqueira, dentro do programa BOCABERTA de dinamización lingüística.

O concerto estará a cargo de Mamá Cabra, un grupo musical especializado en música infantil en lingua galega. Ola, ola, la! é unha aposta musical para quen gusta da electricidade máis rítmica a dar voltas polo corpo. A través das súas melodías e coa axuda dun DVD-Karaoke, os nenos e nenas aprenderán a cantar as cancións coma se formasen parte da banda. E polo medio, un sorprendente conto de Gloria Sánchez, ilustrado por Kristina Sabaite. A forza da música en directo e da palabra a través da lingua galega.

Está dirixido sobre todo a nenos e nenas de 4 a 8 anos e a toda a familia.

Aquí vos deixo unha pequena mostra do ben que o pasamos no concerto.

Día da ciencia en galego

2010-11-05T08:54:00.003Z

Aquí vai a nosa pequena contribución ao DÍA DA CIENCIA EN GALEGO.
Divulgamos a figura de Ramón María Aller Ulloa, astrónomo, sacerdote e matemático galego, a través dun video sobre a súa persoa que elaboraron para Historias de Galicia.

Xornada pola ciencia en galego

2010-10-27T14:07:00.000+01:00

A Coordinadora Galega de ENDL xunta os esforzos dun feixe de organizacións (AGAPEMA, ENCIGA, AP ETEGA, IGACIENCIA, SGAPEIO , A Mesa pola Normalización Lingüística), institucións (Universidade de Santiago, Universidade da Coruña, Instituto da Lingua Galega), sindicatos (CIG-Ensino, STEG, Nova Escola Galega, AS-PG) e outros organismos, para promover tamén o DÍA DA CIENCIA EN GALEGO, dedicado este ano ao astrónomo galego Ramón María Aller, ao físico escocés James Clerk Maxwell e ao poeta medieval Afonso X, tamén científico.

Na web xornada pola ciencia en galego podedes atopar toda a información relacionada, así como as iniciativas que se están desenvolvendo e os centros que xa confirmaron a súa participación.

Aínda estades a tempo de colaborar e reclamar o dereito a gozar da ciencia en galego.

Linguas en contacto

2010-10-05T10:32:00.000+01:00

Xano Cebreiro, de Remexer Na Lingua, fixo este fermoso vídeo didáctico sobre as linguas en contacto e os principais fenómenos que inflúen nesa convivencia.
Seguro que vos ha ser moi útil nas aulas de secundaria.

Principais fenómenos das linguas en contacto from xanocebreiro on Vimeo.

O noso agradecemento e parabéns por este estudado e concienciudo traballo.

Aulas en galego coa forza da lei

2010-09-17T08:53:00.000+01:00

Mostramos unha presentación divulgada pola Coordinadora Galega de ENDL que ofrece unha guía con apuntamentos para dar aulas en galego con seguridade legal.

presentacion

E aproveitamos tamén para pór a ligazón da declaración que IGACIENCIA (Institución Galega da Ciencia) fixo a respecto do Decreto 79/2010.

O Decreto impide a competencia lingüística en igualdade

2010-09-14T09:17:00.000+01:00

O pasado venres, a Casa da Cultura de Redondela acolleu a presentación do libro "Estudos xurídicos sobre o Decreto para o plurilingüismo", editado por Laiovento, na que o coordinador do traballo, o xuíz Luis Villares Naveira, fixo unha exposición dende o punto de vista legal dos erros e ilegalidades deste Decreto.

Entre as conclusións deste estudo salienta o feito de que o Decreto 79/2010 vai en contra do principio constitucional da xerarquía normativa ao contradicir a Constitución Española (principio de igualdade), a Carta Europea das linguas rexionais ou minoritarias (que promove o ensino en exclusividade na lingua propia), a Lei de Normalización Lingüística (que obriga ás autoridades educativas a aprobar medidas que promovan o uso progresivo do galego no ensino), e a LOE (que ten como obxectivo principal acadar unha competencia real entre as dúas linguas oficiais).

Entre as súas conclusións salienta o feito de que seguir utilizando a lingua galega como lingua de ensino nas asignaturas científico-técnicas non é un acto de insubmisión ao Decreto senón un acto de reafirmación no cumprimento das normas que están por riba do Decreto para o Plurilingüismo dentro da xerarquía normativa.

Deixóvos aquí unha pequena mostra da súa intervención para que xulguedes por vós mesmos e actuedes en consecuencia.

A ilegalidade do Decreto from SNL Redondela on Vimeo.

Xerarquía normativa from SNL Redondela on Vimeo.

A igualdade real é a dos resultados from SNL Redondela on Vimeo.

Axudas para a dinamización lingüística nos centros educativos

2010-09-03T12:21:00.000+01:00

A SXPL (Secretaría Xeral de Política Lingüística) convoca axudas para desenvolver proxectos de fomento do uso do galego nos centros de ensino non universitario de Galicia, durante o curso escolar 2010-2011.

A convocatoria está destinada á presentación de proxectos de fomento do uso do galego nos centros de ensino público de Galicia, promovidos polos Equipos de Dinamización da Lingua galega, nova nomenclatura segundo o Decreto 79/2010 para os ENDL.

O prazo de presentación de solicitudes remata o vindeiro 1 de outubro de 2010.

Profes co galego

2010-08-13T10:19:00.000+01:00

Hai uns días que se creou no facebook a plataforma "PROFES CO GALEGO", outra nova xanela aberta á nosa lingua para o profesorado que cre que a lingua galega pode e debe ser a lingua vehicular de todas as materias, e para todas as persoas que comparten esta idea.

Aquí vos deixo a súa declaración de principios para que vos sumedes e a divulguedes tamén:

Trátase de poñer en contacto ao profesorado de Matemáticas, Tecnoloxía, Física e Química e outras materias, tanto de primaria como de secundaria, aos que o novo decreto non lles permite impartir as aulas en galego. O que pretendemos con este grupo é crear un foro de debate, co obxectivo de que en setembro teñamos deseñada unha liña de actuación conxunta, e que ninguén se sinta só, aínda que así o estea no seu departamento ou incluso no seu claustro. Tamén servirá para comentar os problemas que se nos vaian presentando unha vez iniciado o curso.

Lingua materna?

2010-06-30T13:48:00.000+01:00

Xa hai uns días que Carta Xeométrica fixo esta reflexión. Eu non me resisto a poñer aquí, polo menos, a parte final (que non ten desperdicio). E se vos convida a lela toda, tedes arriba o enlace.

Pregunteime moitas veces polo seu significado e, por máis voltas que lle daba acababa escorregando e só concluía que ningunha das ideas que eu podía ter do que significaba iso da lingua materna me servía. Velaí vai o estudo que me permitiu achegarme a ese concepto.
Problema 1.
a) O pai fala en galego e a nai en castelán. Cal é a lingua materna do neno?
b) O pai fala en castelán e nai en galego. Cal é a lingua materna do neno?
c) Os pais falan en castelán pero están en Suiza. O neno está ao coidado dos avós que falan en galego. Cal é a lingua materna do neno?
d) Idem ao anterior pero co avó de Zamora, que aínda que leva trinta anos viviendo en Galicia nunca pronunciou unha palabra en galego. No entanto a avoa só fala nesta lingua. Cal é a lingua materna do neno?
Problema 2.
a) Os pais falan sempre en galego pero diríxense á filla en castelán. Cal é a lingua materna da nena?
b) A nai fálalle en sueco, o pai en galego, pero o neno está de luns a venres case todo o día cos avós que sendo galego-falantes sempre usan o castelán coa rapaza. Cal é a lingua materna da nena?
Problema 3.
a) Os pais fálalle normalmente en galego pero a nena pasa tres horas diarias vendo Clan TV (en español). Cal é a lingua materna da nena?
b) Os pais fálanlle en galego e como son lusistas só teñen na tele canles portuguesas. Cal é a lingua materna da nena?
Problema 4.
a) No caso dos pais lusistas do problema anterior resulta que o neno vai a unha escola infantil de cidade de ambiente castelán-falante que antes tiña unha liña en galego pero que cos novos tempos desapareceu polo que o ensino nesa escola é completamente en castelán. Cal é a lingua materna da nena?
b) Os pais chegaron de León hai 15 anos. El é veterinario e fala en galego fóra da casa. A nai só usa o castelán. Viven nunha vila na que a lingua máis usada é o galego, no entanto nos comercios úsase maioritariamente o castelán. Cal é a lingua materna da nena?
c) O neno aprendeu a falar en romanés e ten sete anos. Como quedou orfo foi adopatado por unha familia galego-falante. Na escola o ambiente é castelófono. Cal é a lingua materna do neno?

Solución: Da pregunta 1 deducimos que a lingua materna non é a da nai, pero tampouca a do pai nin a dos avós ou titores do neno. Polo tanto a lingua ambiental familiar non é a lingua materna.
Na pregunta 2 reafírmase as conclusións tiradas da pregunta 1 e ademais sácase que a lingua materna no é a lingua na que os pais ou familiares se dirixen ao rapaz.
Ao lermos a terceira pregunta decatámonos de que alingua materna tampouco é a dos medios de comunicación.
Da cuarta pregunta extraemos a conclusión de que a lingua materna non é aquela na que aprendemos a falar, nin a lingua ambiental da sociedade na que vive o neno.
A conclusión é clara: iso da lingua materna non é un concepto, é un prexuízo.

Boas vacacións e forza para a lingua

2010-06-23T08:04:00.000+01:00

Aproveitamos a tarxeta que editou a Coordinadora Galega de ENDL para desexarvos nós tamén unhas boas e fructíferas vacacións e forza para a lingua galega.

Que o vindeiro curso chegue con ideas anovadas e, malia as decisións contrarias á nosa lingua, sexamos quen de normalizala e facer dela o noso mellor instrumento de comunicación e aprendizaxe.

Novoneyra en árabe e resumo

2010-06-18T12:06:00.010+01:00

Nesta última mostra do traballo desenvolvido polo alumnado dos cursos de alfabetización e poboación inmigrante, achegamos o resultado que obtivo Rosalía Giménez Hernández coa lectura do poema Letanía de Galicia.

E a seguir a tradución deste mesmo poema ao árabe, سلسلة من غاليسيا, feita por Mohammed Charafi.

Finalmente presentamos unha galería fotográfica que serve de colofón á nosa sinxela homenaxe a Uxío Novoneyra.

A música pertence ao último traballo de Uxía Senlle, no que pon música a poemas deste autor, a aproveitamos o fermoso "No bicarelo do bico do brelo":

NO bicarelo do bico do brelo
canta o paxariño.
No mesmiño
bicarelo do bico do brelo.

CANTA o cuco cala e canta
dos castiñeiros do val.
Pasa o tempo e non di nada
e volta o cuco a cantar.

Biografía de Novoneyra e poemas en alemán

2010-06-17T14:08:00.021+01:00

Hoxe imos mostrar outras dúas facetas do alumnado de alfabetización de persoas adultas e estranxeiras.
Malia o esforzo que supuxo para algúns deles ler textos en galego, cando nunca foran escolarizados na nosa lingua, o traballo desenvolvido na aula ao longo deste curso fixo posible que Ignacio M. Rodríguez Martínez se atrevese coa biografía de Uxío Novoneyra:

E que Concepción Dosantos Otero demostrase que si é capaz de ler na nosa lingua o poema Se o pasado é pasado:

Claudia Scheffler traduciu e leu este mesmo poema en alemán, co título: Wenn das vorbei ist vorbei.

E finalmente Ceferina Fidalgo Quintas ofrécenos o poema Libertá chamas nos ollos tristes,

seguida da versión en alemán deste mesmo poema que fixo René Scheffler: Freedom Flammen in den traurigen Augen.

Novoneyra en inglés e malaio

2010-06-16T17:43:00.012+01:00

Comezamos hoxe coas entregas de diversos textos de Uxío Novoneyra traballados nas aulas dos cursos de alfabetización de persoas adultas e de poboación inmigrante, realizados durante o curso 2009-2010 e organizados pola Concellaría de Servizos Sociais e Igualdade do Concello de Redondela.

A biografía e máis os textos traballados con este alumnado, tan diverso e de orixes tan distantes, serviu para que se puideran achegar á nosa lingua e á obra do autor homenaxeado nas Letras Galegas 2010 e, asemade, para que nós sexamos conscientes da diversidade cultural e lingüística e da riqueza que iso supón para a humanidade.

O resultado da dedicación e entusiasmo das dúas profesoras responsables destes grupos, Aldina Ferreira Fernández e Teresa Couñago Soto, transmítese tamén nas lecturas do seu alumnado, que foron presentadas inicialmente na HOMENAXE A NOVONEYRA, e que agora iremos traendo a este blog paseniñamente.

A primeira mostra correspóndese coa lectura do poema Fiandeira namorada, feita por Milagros Rodríguez Mosquera en galego,

e por Wan Zalimy Omar en inglés e malaio.

Spinstress of feeling from SNL Redondela on Vimeo.

Permintal perasaan from SNL Redondela on Vimeo.

As ciencias en galego

2010-06-11T10:19:00.019+01:00

A Asociación de Ensinantes de Ciencias de Galicia, ENCIGA, vén de facer público un comunicado sobre o decreto do plurilingüismo.
Reproducimos aquí un parágrafo para apoiar as súas manifestacións e reinvindicar o uso do galego no ensino, tamén na área de ciencias.
Podedes ver o texto completo premendo no título.

Comunicado da Asemblea de ENCIGA sobre o decreto de plurilingüismo

A Asociación dos Ensinantes de Ciencias de Galicia (ENCIGA), na Asemblea celebrada o 7-V-2010, aprobou por unanimidade transmitir á Consellería de Educación e aos medios de comunicación a seguinte resolución.

5º.- O decreto supón unha imposición aos profesores, moitos da nosa Asociación, do uso do castelán. En vez de promover o uso do galego como sería razoable nunha comunidade cunha lingua propia, promóvense leis que o desprotexen, involucrando nesta tarefa ao profesorado das áreas de Ciencias. Isto é malo para o país, para os centros, para a docencia das ciencias, para o profesorado implicado nestas áreas e, por suposto, malo para o alumnado e para toda a sociedade galega.

6º.- Por todo isto, consideramos razoable e apoiamos a decisión do profesorado que se ten manifestado publicamente no sentido de non aceptar a substitución do galego polo castelán nas súas aulas.

Santiago de Compostela a vinte e sete de maio de 2010

Ademais a CIG-ENSINO, en colaboración coa plataforma Queremos Galego, convocou un encontro para reclamar o dereito a seguir a impartir as aulas de Matemáticas, Tecnoloxía e Física e Química en galego, e para amosar o rexeitamento a este decreto que procura erradicar o galego como lingua de comunicación científica.
O encontro terá lugar o vindeiro día 18 de xuño, ás 18 horas, no Museo do Pobo Galego, e nel acordaranse tamén as actuacións que se desenvolverán durante o vindeiro curso, reafirmando a firme vontade de ensinar en galego como compromiso e lealdade co idioma.

Pois alén desta iniciativas, a Comisión Interuniversitaria de Política Lingüística desenvolve unha campaña titulada EN GALEGO TAMÉN SE FAI CIENCIA.
Divulgamos aquí o vídeo de presentación para irmos facendo boca.

En galego tamén se fai ciencia from En galego tamén se fai ciencia on Vimeo.

FÁLALLE GALEGO! con TANXARINA

2010-06-10T13:31:00.000+01:00

A presentación da campaña de normalización lingüística "A MELLOR ESCOLA, A CASA. FÁLALLE GALEGO!" foi toda unha revelación: presentamos e mostramos o proxecto e divertímonos moito con TANXARINA e coas súas sutís reflexións sobre a nosa lingua.

Para os que non puidestes asistir aquí vos deixamos unha pequena mostra, que non é nada comparado co que gozamos o sábado.

Presentación da campaña "A MELLOR ESCOLA, A CASA".

2010-06-04T10:52:00.005+01:00

O Auditorio da Xunqueira de Redondela acollerá mañá, 5 de xuño, ás 20:00 horas, a presentación e divulgación da campaña de dinamización lingüística: "A MELLOR ESCOLA, A CASA. FÁLALLE GALEGO!".

Este traballo desenvolveuse nos centros educativos redondeláns durante o segundo trimestre do presente curso, e consistiu nun chamamento ás familias para colaboraren na divulgación de todos aqueles elementos que conforman a nosa tradición oral: ditos e rimas, refráns, cantigas, contos, xogos populares e adiviñas. E, alén diso, animalas a que utilicen a lingua galega nas súas relacións familiares, para facer efectiva a transmisión da lingua propia de avós a pais e a fillos.
O material recollido, froito deste traballo, está composto por gravacións de audio, vídeo e presentacións, e foi recompilado e editado posteriormente nun CD con material multimedia baixo o título da campaña: “A mellor escola, a casa. Fálalle galego!”.
Este material será distribuído entre os centros educativos como mostra do traballo desenvolvido e de que a transmisión da lingua aínda está viva, e cómpre xuntar todos os esforzos e todas as voces para fortalecela e proxectala cara ao futuro.

No acto do sábado farase a presentación deste traballo e, posteriormente, o grupo de monicreques TANXARINA representará unha función do seu espectáculo TITIRICIRCUS, onde afondará na necesidade de falar galego e de aprenderlle a nosa lingua ás futuras xeracións.
A entrada a esta celebración-espectáculo é de balde e está aberta a toda a cidadanía.

Nas vindeiras semanas iremos divulgando neste blog os traballos recollidos.

2010-06-03T09:46:00.003+01:00

VÍDEO E PROGRAMA DE RADIO SOBRE UXÍO NOVONEYRA
Letras Galegas
Para completar as actividades que realizamos sobre Uxío Novoneyra, elaboramos un vídeo sobre a súa vida e obra, así como un programa de radio. Podes descargalos nos seguintes enlaces:
VÍDEO SOBRE UXÍO NOVONEYRA
PROGRAMA DE RADIO SOBRE UXÍO NOVONEYRA

Intercambio con Monção

2010-05-31T14:12:00.002+01:00

O venres pasado os centros de ensino secundario redondeláns recibiron a visita do alumnado portugués da EPRAMI e da Escola Secundária de Monção. Pola mañá o alumnado de 10º ano portugués viviu nos centros de secundaria de Redondela as particularidades do noso sistema educativo e observaron as semellanzas e diferencias das dúas linguas irmás.
Ademais a convivencia co alumnado de 4º da ESO galego serviu de mostra para comprobar a nosa facilidade de comunicación na nosa lingua cos veciños portugueses.
Logo todos os participantes no intercambio viaxaron á Illa de San Simón para celebrar un xantar conxunto e unha visita ás illas.

A experiencia vivida fai prever sucesivos contactos e intercambios que han frutificar nunha máis intensa e enriquecedora relación. Podedes ver o artigo que publica a profesora Teresa Simões no Jornal Digital da Escola Secundária de Monção.

Ademáis tamén se poden ler as novas da xornada de intercambio do día 29 de abril en Monção nestes dous enlaces: EPRAMI e Escola Secundária.

Decreto 79/2010 do plurilngüismo

2010-05-26T11:36:00.006+01:00

Finalmente, e malia a oposición de amplos sectores da sociedade e da maioría da comunidade educativa galega, o DOG núm. 97, do martes 25 de maio de 2010, publica o Decreto 79/2010, do 20 de maio, para o plurilingüismo no ensino non universitario de Galicia.
De pouco serviron o rexeitamento do Consello Consultivo, do Consello Escolar, da Real Academia Galega, do Consello da Cultura, das universidades, dos sindicatos que representan o 90% do profesorado, e de asociacións e plataformas diversas.

Para sumarnos a este rexeitamento colectivo poñemos no noso blog a nota de prensa divulgada pola Coordinadora Galega de ENDL, que subscribimos, e unha recompilación de diferentes mostras de rexeitamento feita pola CTNL.

Presentación da obra de Uxío Novoneyra

2010-05-24T13:42:00.007+01:00

Dende o IES Mendiño achéganos esta presentación en Power Point con poemas de Uxío Novoneyra e fotografías ben suxerentes do Courel, que tamén axudan a comprender mellor os seus versos.
Para ver a presentación preme no enlace.

BIOGRAFÍA UXÍO NOVONEYRA

2010-05-18T09:57:00.026+01:00

Biografía de Uxío Novoneyra, feita polos alumnos de 4º de primaria do CEIP Porto Cabeiro.
Como é extensa está divida en 2 partes.

PRIMEIRA PARTE

SEGUNDA PARTE

LETRAS GALEGAS 2010 UXÍO NOVONEYRA

2010-05-18T09:48:00.003+01:00

Dende o CEIP PORTO-CABEIRO elaboramos diferentes actividades sobre a vida e obra de Uxío Novoneyra. Se as queres traballar cos teus alumnos é preciso ter instalado o programa Smart Notebook. Neste enlace descárgase a última versión.

LETRAS GALEGAS 2010

2010-05-10T19:09:00.004+01:00

No CEIP de Cedeira elaboramos varias actividades para que os nenos e nenas coñezan e valoren a figura do poeta Uxío Novoneyra.
Temos en primeiro lugar unhas actividades elaboradas co programa Ardora: unha delas céntrase en Uxío Novoneyra e outra na Serra do Courel (esta conta cunha ficha de traballo en Word). Van en arquivos comprimidos. Podédelas descargar facendo clic no seu nome:

ACTIVIDADE SOBRE UXÍO NOVONEYRA FEITA CO PROGRAMA ARDORA
ACTIVIDADE SOBRE O COUREL FEITA CO PROGRAMA ARDORA

Elaboramos para pizarra dixital unha actividade no programa Smart Notebook para Primaria que podes descargar aquí.
Para Educación Infantil preparamos varias actividades para pizarra dixital co programa Smart Notebook arredor do libro Ilda, o lobo, o corzo e o xabarín.

CONTO ILDA
ACTIVIDADES
UXÍO NOVONEYRA

Finalmente tendes a Oca sobre Uxío Novoneyra para achegar a este autor dun xeito lúdico aos rapaces/as de Educación Primaria. É para traballar na pizarra dixital.

Unidade didáctica para 2º ciclo de primaria

2010-05-09T23:25:00.022+01:00

O traballo segue a aumentar, e desta volta o CEIP Outeiro das Penas envíanos as unidades didácticas sobre Uxío Novoneyra que elaboraron para o 2º ciclo de primaria.

Preme no enlace e accederás á primeira delas: Actividades para terceiro nivel

"Facendo pés de lá, metéronse á bouza con máis ruxir do medo a bater no peito ca dos pés na terra e dos brazos nas froumas e follata do carreiro cego. Uces, xestas e rebolas por riba da cabeza e un olor a sombrizo, a sitio bravo e arredado."

O cubil do xabarín, 1990

Despois podes acceder ás actividades que deseñaron para cuarto nivel.

"O Valcarce e sin perguicia

as penas de garamela
apeitar para o Cebreiro
polo marcado carreiro
que a neve volve vago."

Pasadas tódalas Francias, 1993

Xogo sobre un conto de Uxío Novoneyra

2010-04-30T13:26:00.005+01:00

Este xogo feito por Nieves Baños e Mónica Venca do C.E.I.P. de Frián-Teis, propón actividades a partir dun conto de Uxío Novoneyra: "Ilda, o lobo, o corzo e o xabarín". Edelvives, Zaragoza, 1998.
A min gustoume o conto para traballar cos cativos da miña aula de Educación Infantil e os xogos tamén me parecen estupendos así que só podo agradecerlle a Nieves e Mónica que fixeran o esforzo de adaptar o conto e crear os xogos, porque me parecen estupendos. Aquí vos deixo o enlace para que accedades ao xogo:

http://centros.edu.xunta.es/ceipfrian/files/lim/letrasgalegasinf/letras_galegas.html

O CEIP IGREXA CHAPELA E AS LETRAS GALEGAS DO ANO 2010

2010-04-29T21:58:00.000+01:00

A OCA DE UXÍO NOVONEYRA

2010-04-22T11:38:00.002+01:00

Estamos xa no mes de abril. Falta pouco para celebrar as Letras Galegas. Este ano o día está dedicado ao poeta lugués Uxío Novoneyra. Para aprender algo sobre o mesmo, logo de ler a súa biografía e realizar outras actividades que estamos a preparar, podemos xogar á Oca. Preparamos unha versión adicada ao "poeta do Courel".
Pódese descargar facendo clic aquí ou na propia imaxe.
Para xogar é preciso ter instalado o programa Smart Notebook. Neste enlace descárgase a última versión (a proba por 30 días) ou unha versión de balde (a 9.7 gratuíta para Windows).

OS OFICIOS E PROFESIÓNS DA NOSA PARROQUIA:"CEDEIRA"

2010-04-22T11:13:00.002+01:00

No colexio preparamos este programa de radio sobre os oficios tradicionais dos nosos avós e sobre unha tradición da nosa parroquia: a corrida do galo. Para facelo entrevistamos aos nosos avós e outros familiares.
Podedes descargalo facendo clic aquí (son 23,5 MB; ten 25' 45'' de duración

Relatorio de Mª Xosé Queizán

2010-04-21T09:20:00.004+01:00

Lembrade a cita de hoxe, 21 de abril de 2010:
Relatorio de Mª Xosé Queizán na Casa da Cultura de Redondela, ás 20:00 horas.

O GALEGO, ORIXE DO PORTUGUÉS