"Os bonecos de Tanxarina falan galego” é o título dos
encontros didácticos que o
Servizo de Normalización Lingüística e a Concellaría de Cultura
achegan esta semana aos escolares redondeláns.
As
sesións comezan cun percorrido pola historia da compañía
redondelá TANXARINA, á que segue unha exposición e explicación dos tipos de
bonecos e as súas formas de manipulación: títeres de luva, sombras
chinesas, marotes, marionetas de fíos..., que despois conclúen cun
percorrido sensorial e visual a través de pequenas historias do seu
repertorio, contadas e faladas polos propios bonecos.
Os
obxectivos fundamentais desta proposta son dar apoio e motivación ao
teatro que se fai nos centros escolares coa presentación das
múltiples posibilidades do teatro de monicreques e a súa posta en
escena, e promover o uso do galego na actividade teatral e nas
actividades artísticas en xeral.
A
programación inclúe sesións matutinas en horario escolar nos
auditorios do Piñeiral do Crego de Chapela (o luns e o martes), e no
auditorio da Xunqueira de Redondela (de mércores a venres). Nestas
sesións participan preto de 1000 escolares, a maioría de ensino
primario, pero tamén alumnado de infantil, de primeiro da ESO e do
Ciclo superior de Educación Infantil do IES Chapela. Os centros
participantes son: EEI A Marisma, CEIP Igrexa – Chapela, CEIP
Alexandre Bóveda, CEIP Laredo, CEIP Quintela, CEIP Outeiro das
Penas, CEP Santa Mariña, CEIP Porto-Cabeiro, CEIP Santo Paio de
Abaixo, IES Chapela e IES Mendiño.
